UTT AMIS YATOA ELIMU YA UWEKEZAJI KWA WATUMISHI WA HALMASHAURI YA WILAYA YA MOSHI

Posted on: October 7th, 2025

Watumishi wa Halmashauri ya Wilaya ya Moshi wamepatiwa mafunzo kutoka UTT Asset Management and Investor Services (UTT AMIS) kwa ajili ya kutoa elimu ya uwekezaji kwa watumishi wa halmashauri.

Elimu hiyo ililenga kuwajengea uelewa watumishi kuhusu fursa zinazopatikana kupitia mifuko ya uwekezaji wa pamoja (Collective Investment Schemes), ikiwemo jinsi ya kuwekeza katika miradi yenye tija, faida za uwekezaji wa muda mfupi na mrefu, pamoja na namna ya kuandaa mipango ya kifedha binafsi.

Akizungumza wakati wa mafunzo hayo, Afisa Biashara na Uendeleshaji - UTT Bi. Victoria Burra alisema taasisi yao imejipanga kutoa elimu hiyo kwa watumishi wa umma na wananchi kwa ujumla katika mikoa mbalimbali nchini, ili kujenga taifa lenye utamaduni wa uwekezaji na akiba.

Mkurugenzi Mtendaji wa Halmashauri ya Wilaya ya Moshi, Ndugu Shadrack Mhagama aliishukuru UTT AMIS kwa uamuzi wa kuwaletea elimu hiyo watumishi wake, akibainisha kuwa ni fursa muhimu ya kuwasaidia kupanga maisha yao ya kifedha kwa busara zaidi.

Mhagama aliongeza kuwa Halmashauri itaendelea kushirikiana na taasisi za kifedha na uwekezaji ili kukuza uelewa wa watumishi wake katika masuala ya fedha, uwekezaji na maendeleo ya kiuchumi.

Mafunzo hayo ni sehemu ya kampeni ya UTT AMIS ya kutoa elimu kwa umma katika mikoa mbalimbali nchini, ikilenga kuhimiza nidhamu ya fedha na kuchochea ushiriki wa wananchi katika sekta ya uwekezaji.