DC MNZAVA ASISITIZA WAZAZI KUPELEKA WATOTO SHULE

Posted on: January 15th, 2026

Mkuu wa Wilaya ya Moshi Mhe.Godfrey Mnzava amefanya ziara ya kukagua mapokezi ya wanafunzi kwa muhula mpya wa masomo 2026, katika Halmashauri ya Wilaya ya Moshi.

Ziara hiyo imefanyika leo 15, Januari 2026, ambapo Mkuu wa Wilaya amekagua Shule ya Sekondari Mabungo iliyopo katika Kijiji cha Mabungo Kata ya Kirua Vunjo Kusini, pamoja na Shule ya Msingi Dr. Shein iliyopo Kitongoji cha Njiapanda Maghaeibi Kata ya Njiapanda.

Katika ziara hiyo, DC Mnzava ameendelea kusisitiza maelekezo ya Serikali ya kuwataka waalimu kuendelea kuwapokea wanafunzi pasipo kikwazo chochote kile kwani nia ya Serikali ni kuona watoto wote waliochaguliwa kujiunga na kidato cha kwanza  pamoja na wale waliokidhi vigezo vya  kuandikishwa darasa la awali na darasa la kwanza wanapata elimu.

"Ni maelekezo ya Serikali inayoongozwa na Rais wetu Samia Suluhu Hassan watoto wote wapokelewe Shule, sare isiwe kikwazo cha kuzuia watoto kupata haki yao ya Msingi ya kupata elimu, Hilo ni suala la wazazi na walezi wao, nyinyi Waalimu wapokeeni waanze masomo" Amesema DC Mnzava

Aidha, Katika ziara hiyo DC  Mnzava alipata wasaa wa kuzungumza na wanafunzi, ambapo aliwaasa kusoma kwa bidii na kuepuka vishawishi ili waje kulisaidia Taifa, kwani Serikali imeeandaa mazingira mazuri ya kusoma na kujifunzia.

Wakizungumza, kwa niaba ya wanafunzi wenzao wa kidato cha kwanza Prisca L.Mwanyika na Imani B.Mmbaga  wa Shule ya Sekondari Mabungo wamemshukuru Rais Samia Suluhu Hassan kwa ujenzi wa shule hiyo kwani  imewaondolea changamoto ya kutembea umbali mrefu kwenda shule.

Aidha, Katika ziara hiyo DC Mnzava ameendelea kusisitiza wazazi ambao bado hawajaandikisha watoto wao Shule, kupeleka watoto wao shule kwani hakuna kizuizi chochote.