SERIKALI ITAENDELEA KUWAPUNGUZIA WAKULIMA GHARAMA ZA UZALISHAJI

Posted on: July 26th, 2024

Naibu Waziri wa Wizara ya Kilimo, Mhe. David Silinde (Mb) amesema Serikali itaendelea kuwawezesha wakulima kuzalisha kwa uhakika wa gharama nafuu ili waweze kupata faida watakapouza mazao yao.

Amesema tarehe 26 Julai 2024 alipozungumza na wananchi wa kijiji cha Umbwe Kati, Kata ya Kibosho Magharibi Wilaya ya Moshi, Mkoani Kilimanjaro baada kugawa miche ya kahawa iliyozalishwa na Bodi ya Kahawa.

“Ugawaji wa miche hii bure kwa wakulima ni mwendelezo wa kumpunguzia mkulima gharama za uzalishaji. Niwaambie kuwa Serikali itaendelea kumpunguzia mkulima gharama za mahitaji mengine ikiwemo viuatilifu na pembejeo zingine,” amesema Mhe. Silinde.

Akitoa mfano wa kuimarika kwa bei ya zao hilo, Mhe. Silinde amesema Serikali imefanya juhudi kubwa ya kuongeza bei ya kahawa kutoka Shilingi 900 kwa kilo, hadi Shilingi 5800 kwa kilo.

Naye Mbunge wa Moshi vijijini, Mhe. Profesa Patrick Ndakidemi ameishukuru Serikali kwa kuunga mkono juhudi za wananchi wa jimbo hilo katika kuzalisha miche ya kahawa na kuigawa bure kwa wakulima katika kupunguza gharama za uzalishaji.