RAIS WA HUNGARY KATALIN NOVÁK AFANYA ZIARA HALMASHAURI YA WILAYA YA MOSHI

Posted on: July 19th, 2023

Rais wa Hungary Katalin Novák leo tarehe 19 Julai 2023 amefika Mkoa wa Kilimanjaro na kupokelewa na Mkuu wa Mkoa wa Kilimanjaro Mhe.Nurdin Babu na kutembelea  Halmashauri ya Wilaya ya Moshi ambapo alifika eneo la Fumvuhu Kijiji cha Kidia Kata ya Old Moshi Mashariki. Eneo hili la Fumvuhu katika historia lilitembelewa na mtafiti Kálmán Kittenberger  Mwaka 1903 wakati aliposafiri kwenda Mombasa Nchini Kenya akiwa kama Mtaalamu binafsi wa kukausha ngozi za wanyama waliokufa na kuoneka kama hai.

Katika safari yake alikutana na  Mzee Mlasan Moses Malisa ambaye alikuwa ni Kiongozi wa Familia ya Wamalisa. Mtafiti Kálmán Kittenberger aliugua na kutibiwa katika Zahanati ya Wamishenari ya Kidia na kupumzika mahali hapa ambapo umejengwa Mnara wa kumbukumbu na baadaye aliendelea na safari yake.

Mnara huu wa Kihistoria wenye Picha ya Kálmán Kittenberger na Zana kama Nyundo, Mkasi, Mkuki na Jembe ulijengwa na familia ya kina Malisa ili kuonyesha kumbukumbu ya ukarimu wao kwa wageni wakimkumbuka Kálmán Kittenberger  na shughuli zao za asili za Ufugaji na Uhunzi wa chuma.

Katika ziara yake Rais wa Hungary Katalin Novák aliweka shada la Maua katika Mnara huo mdogo na kisha kukutana na Wanafunzi wa Shule ya Msingi Fumvuhu na kupata nafasi ya kushuhudia Walimu wakifundisha wanafunzi madarasani na baadae kupiga picha na wanafunzi pamoja na Wananchi wa Kijiji cha Kidia ambao walimzawadia na kumvisha Kikoi.