MOSHI DC YAPATA BARAZA JIPYA LA MADIWANI, MEELA ACHAGULIWA KUWA MWENYEKITI

Posted on: December 3rd, 2025

Halmashauri ya Wilaya ya Moshi imepata baraza jipya la madiwani pamoja na Mwenyekiti wake leo 3 Disemba 2025, hii ni baada ya madiwani wateule kuapishwa rasmi na hivyo kufungua rasmi shughuli za baraza hilo.

Baada ya madiwani hao  kula viapo, zoezi la uchaguzi wa kumpata Mwenyekiti pamoja na Makamu Mwenyekiti ulifanyika ambapo Diwani wa Kata ya Njiapanda kupitia CCM Mhe. John Mapato Meela alichaguliwa kwa kishindo kuwa Mwenyekiti wa Halmashauri hiyo, sambamba na Diwani wa Kata ya Mwika Kaskazini Mhe. Samwel Shao aliyechaguliwa Kuwa Makamu Mwenyekiti.

Baada ya utaratibu kukamilika Mwenyekiti mpya aliongoza mkutano wa kwanza wa baraza , huku akiwashukuru wajumbe kwa kumchagua na kuomba ushirikiano kwa madiwani hao pamoja na watumishi wa Halmashauri ya Wilaya ya Moshi.

Aidha, Mkurugenzi Mtendaji wa Halmashauri ya Wilaya ya Moshi Ndugu Shadrack Mhagama amewasilisha taarifa ya utendaji kazi wa halmashauri kwa kipindi chote ambapo hakukuwa na baraza ambapo amesema Halmashauri imeendelea kutekeleza miradi mbalimbali ya maendeleo kwa ufanisi mkubwa.

Mgeni rasmi katika Mkutano huo, Katibu Tawala wa Mkoa wa Kilimanjaro Ndugu  Kiseo Yusuph Nzowa amewaasa madiwani hao kuwa waadilifu lakini pia wasome nyaraka mbalimbali kwa umakini ili waweze kuwa na michango yenye tija katika mikutano ya baraza.