MAKARANI WA UCHAGUZI WA JIMBO LA MOSHI VIJIJINI NA VUNJO WAAPISHWA NA KUPATIWA MAFUNZO

Posted on: October 25th, 2025

Makarani wa Uchaguzi wa Majimbo ya Moshi Vijijini na Vunjo, kutoka Halmashauri ya Wilaya ya Moshi, wameapishwa na kupatiwa mafunzo maalum kwa ajili ya kusimamia Uchaguzi Mkuu unaotarajiwa kufanyika tarehe 29 Oktoba 2025.

Mafunzo hayo yamefanyika katika ukumbi wa Chuo cha Polisi Moshi, yakiwa na lengo la kuwajengea uwezo Makarani hao kuhusu taratibu, kanuni, na maadili ya uchaguzi ili kuhakikisha mchakato wa uchaguzi unakuwa huru, haki, na wenye amani.

Akizungumza wakati wa kufungua mafunzo hayo, Msele aliwataka Makarani hao kuwa waadilifu, kufuata kanuni za uchaguzi, na kutekeleza wajibu wao kwa uaminifu ili kuhakikisha uchaguzi unakuwa huru, haki, na wa amani.

“Kazi mliyokabidhiwa ni ya dhamana kubwa kwa taifa. Hakikisheni mnazingatia maelekezo ya Tume, mnajiepusha na upendeleo, na mnasimamia uchaguzi kwa uadilifu na uwazi,” alisema Msele.

Washiriki wa mafunzo hayo wamepatiwa elimu kuhusu utekelezaji wa majukumu ya Makarani wa Uchaguzi, utunzaji wa vifaa vya kupigia kura, kanuni za maadili ya uchaguzi, pamoja na taratibu za upokeaji na uwasilishaji wa matokeo.

Aidha, kupitia mafunzo hayo, washiriki wamekumbushwa kuzingatia maelekezo ya Tume Huru ya Taifa ya Uchaguzi (NEC) na kuhakikisha wanatekeleza majukumu yao kwa uadilifu na uwajibikaji mkubwa katika kipindi chote cha uchaguzi.

Mwisho