HALMASHAURI YA WILAYA YA SONGEA YAFANYA ZIARA KATIKA HALMASHAURI YA WILAYA YA MOSHI NA KUJIFUNZA JUU YA UKUSANYAJI WA WAPATO YA ZAO LA KAHAWA.

Posted on: November 17th, 2025

Ujumbe kutoka Halmashauri ya Wilaya Songea  ukiongozwa na Mkurugenzi Mtendaji Ndugu Elizabeth Gumbo umetembelea leo makao makuu ya Halmashauri ya Wilaya ya Moshi kwa ziara maalum ya kujifunza juu ya ukusanyaji wa mapato kutoka kwenye zao la kahawa na kubadilishana uzoefu.

Bi Gumbo ameongozana na timu ya Wataalam mbalimbali  wakiwemo Wakuu wa Idara za Sheria, Kilimo na mweka hazina wa ofisi yake, wamepokelewa na Afisa Utumishi wa Halmashauri ya Wilaya ya Moshi Bw. Horace Kolimba kwa niaba ya Mkurugenzi Mtendaji.

Akizungumza Katika ziara hiyo Mkurugenzi Mtendaji wa Halmashauri ya Wilaya ya Songea amesema wamechagua kutembelea Halmashauri ya wilaya ya Moshi kwasababu inafanya vizuri katika uzalishaji na uwekezaji kwenye zao la kahawa.

"Halmashauri ya Wilaya ya Songea inazalisha kahawa kama hapa Moshi, lakini dhumuni letu ni kujifunza kwenu ukusanyaji wa ushuru katika zaohilo kwasababu tumeona ni eneo mnalofanya vizuri na wote tunajua umuhimu wa kukusanya mapato kwa Halmashauri"

Pia, Mkurugenzi huyo amemshukuru mwenyeji wake kwa kuwakaribisha kujifunza katika halmashauri yake Huku akiomba ushirikiano huo uendelee kwa maslahi mapana ya umma.

Aidha, Wataalam kutoka Halmashauri zote mbili walipata wasaa wa kujadili kwa kina changamoto za ukusanyaji mapato Katika zao la kahawa, pamoja na njia za kuepukana na changamoto hizo.

Kwa upande wake Afisa Utumishi wa Halmashauri ya Wilaya ya Moshi kwa niaba ya Mkurugenzi akiwaaga wageni wake  ameomba ushirikiano baina ya halmashauri hizo uendelee hasa katika eneo la kubadilishana uzoefu.