MAFUNZO YA UTOAJI WA MIKOPO YA 10% KWA WANAWAKE,VIJANA NA WATU WENYE ULEMAVU

Halmashauri ya Wilaya ya Moshi imeandaa na kufanya Mafunzo elekezi kwa Vikundi vya Wanawake,Vijana na Watu wenye Ulemavu vitakavyonufaika na Mikopo ya 10%.

Mafunzo hayo yalifunguliwa na Mkuu wa Sehemu ya Maendeleo ya Jamii Ndg. Lucas Msele kwa niaba ya Mkurugenzi Mtendaji ambapo Washiriki walikumbushwa kuwa Mikopo watakayoipata wakaitumia kwenye Miradi walioombea na sio kwenda kugawana.

Miongoni mwa mada zilizofundishwa kwenye Mafunzo hayo ni:-

• Kanuni za Usimamizi wa Matumizi ya Fedha za Mikopo na utaratibu wa marejesho
• Kikundi endelevu
• Uongozi katika kikundi

Katika mafunzo hayo yaliyoendeshwa na Wataalam kutoka Halmashauri yakiongozwa na Afisa Maendeleo ya Jamii Bi. Stella Magori, Bw. Ally Tagalile, Bi. Bertha Yairo na Bi. Lydia Njau washiriki pia walipata uelewa juu ya Sifa za kikundi kupata mkopo ambazo ni;

• Kiwe kimesajiliwa kama Kikundi cha Wanawake, Vijana na Watu wenye Ulemavu
• Kiwe kinajishughulisha na ujasiriamali au kinakusudia kuanzisha shughuli za ujasiriamali mdogo au wa kati;
• Kikundi cha Wanawake au Vijana kiwe kina idadi ya wanakikundi kuanzia watano na kuendelea na kwa Kikundi cha Watu wenye Ulemavu, kiwe kina idadi ya wanakikundi mmoja na kuendelea
• Kiwe kina akaunti ya benki iliyofunguliwa kwa jina la kikundi kwa ajili ya matumizi ya kikundi;
• Wanakikundi wawe ni raia wa Tanzania wenye akili timamu
• Kikundi hakitajumuisha wajumbe wenye ajira rasmi.

Mtu mwenye ulemavu anayekusudia kuomba mkopo chini ya masharti ya kanuni atatakiwa kujaza fomu ya maombi ya mkopo itakayoambatishwa na nyaraka zifuatazo;

• Nakala ya cheti cha kuzaliwa au hati ya kiapo inayothibitisha kuzaliwa kwake;
• Nakala ya leseni ya biashara au kitambulisho cha ujasiriamali kilichotolewa na Serikali;
• Nakala halisi ya taarifa ya akaunti kutoka benki
• Nakala halisi ya barua ya utambulisho kutoka kwa Mtendaji wa Kijiji
• Wazo la biashara.

Washiriki walielekezwa pia juu ya Utaratibu wa uombaji wa mikopo

• Kikundi kinachokusudia kuomba mkopo kitatakiwa kujaza fomu maalum itakayotolewa na Mamlaka ya Serikali ya Mtaa ikiwa na viambatisho viguatavyo;
• Katiba ya kikundi
• Cheti cha usajili wa kikundi
• Vikundi vinavyojishughulisha na biashara kiambatishe leseni ya biashara
• Taarifa ya akaunti kutoka katika benki ambayo kikundi kina akaunti
• Barua ya utambulisho kutoka kwa Mtendaji wa Kijiji
• Wazo la biashara likiambatana na mchanganuo wa Matumizi na Faida inayotegemewa kupatikana.
• Maombi yote ya Mikopo kwa sasa yanafanyika kwenye Mfumo wa Usimamiaji na utoaji wa Mikopo ya 10%(TPLMIS) inayotokana na Mapato ya Ndani ya Halmashauri ili kuwezesha Mikopo kwa Wanawake, Vijana na Watu wenye Ulemavu kupitia kiunganishi cha mfumo https://mikopohalmashauri.tamisemi.go.tz