HAFLA FUPI YA UTIAJI SAINI HATI YA MAKUBALIANO YA UJENZI NA USIMIKAJI WA MASHINE YA KUKOBOA MPUNGA KIJIJI CHA MAWALA KAHE MAGHARIBI KATI YA HALMASHAURI YA WILAYA YA MOSHI NA SHIRIKA LA FTK

Hafla fupi ya utiaji saini wa hati ya makubaliano kati ya Halmashauri ya Wilaya ya Moshi, Shirika la FTK na Kijiji cha Mawala inayohusu ujenzi na usimikaji wa mashine ya kukoboa mpunga katika Kijiji cha Mawala imefanyika leo tarehe 18/07/2025 Makao makuu ya Halmashauri ya Wilaya ya Moshi yaliyoko Kitongoji cha Kommbe, Kijiji cha Sango, Kata ya Kimochi.

Hati hii ya makubaliano imetokana na uzalishaji mkubwa wa mpunga unaoendelea katika Kijiji cha Mawala lenye eneo la ukubwa wa ekari 5,000 ambalo linavuna wastani wa tani 9,000 kwa mwaka hivyo kumekuwepo na uhitaji wa kiwanda cha kukoboa mpunga. Ukosefu wa mashine ya kukoboa mpunga katika Kijiji cha Mawala unapelekea wakulima kusafirisha mpunga umbali usiopungua kilomita 10 kwa ajili ya ukoboaji.

Kutokana na hali hii wakulima wengi wamekuwa wakipata hasara kwa kuuza mpunga wao bila kuukoboa wakati wa msimu wa uvunaji ambapo mpunga huwa na bei ya chini. Kwa hali hiyo, Kijiji cha Mawala kwa ushirikiano na Shirika la FTK waliona umuhimu wa ujenzi na usimikaji wa mashine ya kisasa ya kukoboa mpunga ili kupunguza gharama za usafirishaji kwa kusogeza huduma karibu na wananchi sambamba na kuongeza pato la wakulima na Serikali ya Kijiji.

Mradi huu wenye thamani ya Shilingi 277,600,000.00 ambapo FTK wamechangia shilingi 271,600,000.00 na Wananchi shilingi 6,000,000.00 utasimamiwa na Serikali ya Kijiji cha Mawala chini ya uangalizi wa karibu wa Ofisi ya Mkurugenzi Mtendaji (W) na FTK.

Ili kufanikisha utekelezaji wa mradi huu, baada ya Ofisi ya Mkurugenzi kupokea taarifa, iliundwa timu ya majadiliano inayotokana na Idara 5 za Kilimo, Mipango na Uratibu, Maendeleo ya Jamii, Huduma za Sheria na Ardhi. Jumla ya vikao 5 ngazi ya Wilaya na 1 ngazi ya Kijiji vimefanyika. Pia ziara ya ukaguzi wa eneo la mradi ilifanyika na kujiridhisha kuwa eneo lenye ukubwa wa ekari 2 lililokabidhiwa na Kijiji linafaa kwa uwekezaji na halina mgogoro. Kwa utangulizi huo makubaliano (Memorandum of Understanding na Mpango wa biashara (Business Plan) kwa kiwango kilichokubalika kwa pande zote.