TAARIFA YA TATHMINI YA UTEKELEZAJI WA MKATABA WA LISHE KWA KIPINDI CHA ROBO YA PILI (OKTOBA – DESEMBA, 2023)

Afisa Lishe Wilaya Ndg. John Lwena awasilisha Taarifa ya Tathimini ya Utekelezaji wa Mkataba wa Lishe kwa Kipindi cha Robo ya Pili Oktoba - Desemba 2023 mbele ya Mheshimiwa Mwenyekiti ambaye ni Mkuu wa Wilaya ya Moshi Mhe.Zephania Stephan Sumaye pamoja na wajumbe wengine kutoka Halmashauri. ya Wilaya ya Moshi.

Katika wasilisho lake Afisa Lishe Wilaya alieleza kuwa;

Halmashauri ya Wilaya ya Moshi inaendelea kutekeleza afua mbalimbali za Lishe kwa kuzingatia viashiria vya Mkataba wa Lishe kwa kushirikiana na Watendaji wa Kata na Vijiji, Wahudumu wa Afya ngazi ya Jamii na watoa Huduma za Afya vituoni, kwa lengo la kuboresha na kuimarisha afya na Lishe ya watoto, vijana balehe, wajawazito, wanaonyonyesha na wanawake waliopo katika umri wa kuzaa.

Katika kipindi cha robo ya pili (Oktoba-Desemba, 2023) Halmashauri imefanya jitihada kubwa katika utekelezaji wa afua mbalimbali za Lishe ikiwa ni pamoja na kutenga fedha kiasi cha Shilingi 29,470,020.31 kwa ajili ya kutekeleza shughuli za Lishe. Kwa upande wa matumizi, Halmashauri imetumia jumla ya Shilingi 35,738,260.00 (121%) kutekeleza shughuli za Lishe kwa robo ya pili.

Matumizi ya fedha hizo yalielekezwa katika maeneo yafuatayo: Vikao vya kamati ya Lishe na tathimini ya mkataba wa Lishe, Ununuzi wa virutubishi (Multiple micronutrient powder (MNP)) kwa ajili ya watoto wenye umri chini ya miaka mitano, utoaji wa nyongeza ya matone ya vitamini A kwenye vituo vya kutolea Huduma za Afya, kuanzisha bustani za mboga mboga kwenye shule za sekondari pamoja na kutoa elimu ya uzalishaji wa mazao yenye virutubisho kwa wingi ili kukabiliana na tatizo la lishe duni na udumavu kwa watoto wenye umri chini ya miaka 5 kwenye jamii.

Taarifa hii inaangazia utekelezaji wa afua za Lishe katika kipindi cha robo ya pili ya mwaka wa fedha 2023/24, kuanzia Oktoba hadi Desemba 2023.