SHULE YA SEKONDARI YA AMALI KORESA YAANZA KUTOA HUDUMA

Shule mpya ya Sekondari ya Amali Koresa inajengwa katika kijiji cha Koresa, kitongoji cha Miwaleni kata ya Kirua Vunjo Kusini.

Halmashauri ilipokea jumla ya Shillingi 584,280,029.00 kupitia Mradi wa kuboresha Elimu ya Sekondari (Secondary Education Quality Improvement Program – SEQUIP) kwa ajili ya ujenzi wa Shule ya Sekondari ya Amali Koresa.

Mradi wa ujenzi wa shule ya Sekondari ya Amali Koresa  unatekelezwa kwa njia ya manunuzi ya kutumia rasilimali za ndani (force account). Ujenzi ulianza tarehe 26 Septemba, 2024. Hadi sasa ujenzi wa miundombinu upo katika hatua za ukamilishaji ambapo Jengo la Utawala limekamilika, Vyumba 4 vya madarasa na ofisi katikati vimekamilika, Vyumba 4 vya madarasa bila ofisi katikati vimekamilika, Ujenzi wa matundu 4 ya wasichana na 4 ya wavulana yamekamilika, Ujenzi wa kichomea taka (Incinerator) umekamilika, Ujenzi wa Maabara ya Kemia na Bailojia ziko hatua ya ukamilishaji, Ujenzi wa Maabara ya Fizikia, Jengo la TEHAMA na Maktaba unaendelea.

Shule ya Sekondari ya Amali Koresa imesajiliwa kwa namba 7020 na imepangiwa kupokea wanafunzi 83 na wamepokelewa 57 hadi leo tarehe 22/01/2026. Shule ina madawati 120 ambayo yanatosha kwa wanafunzi waliopangiwa shule hii. Aidha shule ina walimu 6 kwa ajili ya kuanza ufundishaji.

Ujenzi wa miundombinu ya shule mpya ya Sekondari ya Amali Koresa umekuwa na manufaa ya moja kwa moja kwa wananchi wa Wilaya ya Moshi kwani uwepo wa ujenzi wa mradi huu umezalisha ajira za moja kwa moja za Muda 144 kwa wananchi wa Halmashauri ya Wilaya ya Moshi na kuongeza soko la bidhaa za viwandani na bidhaa zinazopatikana katika mazingira yanayozunguka mradi kama vile mawe, kokoto, na mchanga, hivyo kuchangia kuongeza kipato kwa wananchi. Uwepo wa shule hii ni fursa kwa wahitimu watakaopata ujuzi utakaowapa nafasi ya kujiajiri na kuajiriwa mara baada ya kuhitimu, kuwa shindani katika soko la ajira na kushiriki kutatua changamoto za jamii ya kitanzania.