MILIONI 351,500,000/= ZATUMIKA KUFANYA UKARABATI WA MIUNDOMBINU YA SHULE YA MSINGI ONGOMA.

Shule ya Msingi Ongoma ni mojawapo ya shule kongwe katika Halmashauri ya Wilaya ya Moshi na ilianzishwa mwaka 1964   katika Kijiji cha Ongoma, Kata ya Uru Kaskazini. Kufikia mwaka 2024, shule ilikuwa na jumla ya wanafunzi 177, wakiwemo wavulana 80 na wasichana 97. Aidha, kwa sasa shule ina Jumla ya walimu watano (5), ambapo wanaume ni wawili (2) na wanawake watatu (3).

Shule ilikuwa na jumla ya vyumba vya madarasa saba (7), ambavyo vyote vilikuwa vimechakaa sana. Madarasa haya yalikuwa yanavuja, sakafu imeharibika vibaya, na nyufa kubwa katika kuta. Hali hii ilisababisha mazingira ya kujifunzia kuwa hatarishi kwa wanafunzi na walimu, hususani wakati wa mvua.

Kutokana na hali hiyo duni ya miundombinu, Serikali iliona ni vyema kujenga miundombinu mipya ya shule hii, ambapo imelazimu kuwahamisha wanafunzi wote kwenda shule jirani, hususani Shule ya Msingi Fumbuni. Lengo kuu la hatua hii ni kupisha ubomoaji wa majengo ya zamani ili kuanza ujenzi wa shule mpya yenye miundombinu bora na salama.

Ujenzi wa miundombinu ya Shule ya Msingi Ongoma inajengwa kwa gharama ya Shillingi 351,500,000/= kupitia Mradi wakuboresha Elimu ya Msingi(EP4R). Fedha hizi zilipokelewa tarehe 18 Juni 2024 kupitia akaunti  ya shule ya msingi Ongoma. Vilevile kwenye mpango wa maendeleo ya ndani ya halmashauri ya Wilaya ya Moshi shule ya msingi Ongoma ilifanikiwa kupokea kiasi cha Tsh. 10,000,000/= (Milioni kumi) ambapo fedha hizo zilipokelewa tarehe 11/09/2025 kupitia account ya  shule ya msingi Ongoma

Mradi wa ujenzi wa shule mpya ya msingi Ongoma unatekelezwa kwa njia ya ‘force account’ ambapo manunuzi ya vifaa na malipo ya fundi yanafanyika chini ya uangalizi wa kamati ya Ujenzi, Manunuzi na mapokezi kwa kushirikiana na wataalam kutoka Halmashauri.Ujenzi ulianza tarehe 28 Desemba, 2024 na uanatarajiwa kukamilika tarehe 10 Oktoba, 2025.

Ujenzi wa majengo yanayopaswa kujengwa na fedha hizo ipo katika hatua mbalimbali kama ifuatavyo: -

Ujenzi wa vyumba saba (7) vya madarasa ya shule ya msingi na vyumba (2) vya Madarasa ya   shule ya awali Pamoja na ujenzi wa jengo la utawala tayari yameshakamilika.

Ujenzi wa matundu 16 ya vyoo yakiwemo matundu 8 ya msingi, matundu 6 ya awali na matundu 2 ya walimu yote yamekwishakamilika.

Ujenzi wa miundombinu ya kichomea taka (Incinerator), ujenzi wa uzio (fance) bembea pamoja na tenki la maji ya chooni bado havijajengwa ila tayari zabuni zimeshatangazwa, fundi alishapatikana na kwa baadhi ya zabuni zimeshapata watu hivyo mchakato wa usainishaji muhtasari na uandaaji wa mikataba unaendela ili kazi iweze kuanza mara moja

Hadi kufikia tarehe 20/11/2025 kiasi cha shilingi 326,835,140.00 kimetumika kununua vifaa vya ujenzi Pamoja na malipo ya mafundi. Kiasi cha shilingi 24,664,860 kitatumika kulipa mafundi na wazabuni. Katika fedha hizi kiasi cha shilingi 8,457,500 kitatumika kulipa mafundi na kiasi cha shilingi 15,300,00 kitatumika kulipa wazabuni. Vile vile kiasi cha Tsh. 10,000,000/= Bado hazijatumika ila zitatumika katika kutekeleza shughuli za ujenzi tu