Wajasiriamali Moshi wahamasika kukata vitambulisho vyao

Posted on: April 8th, 2019

Mkurugenzi Mtendaji wa Halmashauri ya Wilaya ya Moshi ndugu Kastori Msigala anaendelea na ziara yake ya siku tatu ndani ya Halmashauri katika kuhakikisha agizo la Rais wa Jamhuri ya muungano wa Tanzania Mhe.John Pombe Magufuli kuhusu ugawaji wa vitambulisho vya wajasiriamali wadogo wadogo linatekelezwa kikamilifu.

Akizungumza wakati wa ziara yake leo ndani ya kata ya Kahe ndugu Msigala amesema ni jukumu la kila mjasiriamali mdogo kujitokeza na kuchukua kitambulisho cha kumtambulisha rasmi katika shughuli zake za kujiingizia kipato.

Akiwa kata ya Mabogini ndugu Msigala amesema ni jukumu la kila mtumishi ndani ya Halmashauri kuunga mkono na kutekeleza agizo la ugawaji wa vitambulisho kwa wajasiriamali wote wenye vigezo ikiwa ni pamoja na wenye kipato cha shilingi milioni nne kwa mwaka sawa na kipato cha shilingi 12,000 kwa siku.

Kabla ya kuanza ziara ndugu Msigala amewataka watumishi wote wakiongozwa na wakuu wa Idara na vitengo kutii na kutekeleza agizo la Mhe.Rais sambamba na kasi iliyopo sasa ya ugawaji wa vitambulisho hivyo ili kufikia malengo kwa wakati.

“Kila mjasiriamali mdogo ni lazima awe na kitambulisho.Watumishi wote tuungane kuhakikisha elimu ya kutosha kuhusu vitambulisho vya wajasiriamali wadogo wadogo inatolewa kwa wanaMoshi ili kuleta uelewa wa pamoja.”amesema Msigala.

Mpaka sasa Halmashauri ya Wilaya ya Moshi inaongoza kimkoa kwa asilimia 52 ya mauzo ya vitambulisho vyote elfu 10 vilivyotolewa kwa awamu mbili kwa ajili ya wajasiriamali wadogo wadogo wa Halmashauri ya Moshi.Aidha kasi ya ugawaji bado inaendelea kwa kuhusisha timu nzima ya watumishi wa Halmashauri .