Michezo ni afya -Mhe.Kilawila

Posted on: November 29th, 2018

Mwenyekiti wa Halmashauri ya Wilaya ya Moshi Mhe.Michael Kilawila ameendesha kikao cha Baraza la madiwani wa Halmashauri ya Wilaya ya Moshi katika kikao cha kawaida  kujadili taarifa za robo ya kwanza kwa mwaka fedha 2018/2019. Kikao hicho kimefanyika katika ukumbi wa mikutano wa Halmashauri ya Moshi ukijumuisha madiwani,wataalam wa Halmashauri ,wananchi wa Halmashauri ya Wilaya ya Moshi na  wadau mbalimbali wa maendeleo katika nyanja mbalimbali.

Wakati wa kikao waheshimiwa madiwani walipata muda wa kujadili mambo mbalimbali ya kimaendeleo yanayogusa Idara mbalimbali ikiwemo elimu,afya,kilimo,utawala na Mapato na Matumizi.

Katika kujadili taarifa mbalimbali Mhe.Emmanuel Mbando diwani wa kata ya Kahe Mashariki aliibua hoja ya michezo kutumika kama zana ya kuwafikia wananchi wa Halmashauri ya Moshi katika kutoa elimu mbalimbali za kimaendeleo.

Hoja ya Mhe.Mbando imeungwa mkono na waheshimiwa madiwani wote,baraza hilo limejadili suala la maboresho katika michezo mbalimbali kwa ngazi zote za kijamii hasahasa shuleni.

Akiunga mkono hoja ya Mhe.Mbando Mhe.Kilawila amesema michezo ni muhimu kwa sababu ina faida nyingi katika maisha ya binadamu. Mhe Kilawila ameainisha baadhi ya faida za michezo kuwa ni pamoja kuimarisha urafiki na mahusiano baina ya mtu na mtu au makundi ya watu hasahasa maeneo ya maofisini.

Aidha Mhe. Mwenyekiti amesema michezo huunganisha watu na kuimarisha amani kwa wahusika katika eneo husika,Sambamba na hilo ameongeza kuwa michezo  huondoa msongo wa mawazo kwa watu na ni fursa ya ajira hasahasa kwa vijana.

Aidha Mhe.Kilawila amewataka waheshimiwa madiwani wa Halmashauri ya Moshi kuhamasisha jamii juu ya masuala ya michezo na faida zake kila mmoja katika eneo lake sambamba na kuboresha miundo mbinu mbalimbali ikiwemo viwanja vya michezo na kuwataka kutosubiri serikali ifanye kila kitu. “Tusisubiri serikali ifanye kila kitu,TUTACHELEWA, hamasa ya michezo shuleni na katika jamii nzima ya Moshi ni LAZIMA.” Amesema Mhe.Kilawila.

Afisa utamaduni na michezo wa Wilaya ya Moshi ndugu Shaaban Ngume amesema Halmashauri ya Wilaya ya Moshi ipo katika mpango wa kurudisha kasi ya michezo iliyokuwepo awali hivyo uhamasishaji kwa ngazi ya jamii na shule unaendelea.

Ndugu Ngume ameuhabarisha umma wote Moshi uwepo wa tamasha la wachaga “chaga festival” kwa  mwezi Disemba 2018, na kuwataka wananchi wote wa Moshi kuhudhuria na kula pamoja vyakula vya asili kama ishara ya kuenzi tamaduni zetu na pia mwanzo wa kutengeneza mipango mbalimbali ya kimaendeleo ikiwemo michezo.