Maafisa elimu Moshi waibuka kidedea taifa

Posted on: November 29th, 2018

Halmashauri ya Wilaya ya Moshi yapata sifa  katika sekta ya elimu nchini Tanzania kutokana na uwepo wa shule nyingi zaidi za msingi na sekondari kuliko Halmashauri nyingine yoyote nchini Tanzania.Halmashauri ina jumla ya shule za msingi 274 na shule za sekondari 98 zinazoongozwa na kusimamiwa na maafisa elimu wawili tu, Afisa elimu msingi na Afisa elimu sekondari.

Akizungumza katika kikao cha baraza la madiwani wa Halmashauri ya Wilaya ya Moshi Mbunge wa Vunjo Mhe.Mbatia amepongeza kazi kubwa inayofanywa na Halmashauri ya Wilaya ya Moshi kupitia idara ya elimu kwa kuwa na matokeo mazuri pamoja na changamoto ya uwingi wa shule wanazozisimamia na uchache wa watumishi waliopo sasa.

Aidha Mhe.Mbatia amelitaarifu baraza kuwa hali ya Halmashauri ya Moshi kuwa na shule nyingi zinazoongozwa na watumishi wachache imekuwa ikiwastaajabisha wengi maeneo mbalimbali nchini hata kupelekea kutaka kuja kujifunza namna Halmshauri inavyofanikiwa. Sambamba na hilo Mhe. Mbatia amesema aliongea na Waziri Mkuu Mhe.Kassim Majaliwa kuhusu suala hilo na Mhe.Majaliwa ameahidi kuja kutembelea Halmashauri ya Moshi kuona utendaji na ufanisi huo wa kuvutia ndani ya Idara ya elimu Moshi.