Kamati ya fedha Moshi DC yatembelea miradi

Posted on: August 1st, 2019

Kamati ya fedha ,uongozi na mipango ya Halmashauri ya Wilaya ya Moshi inaendelea na usimamizi madhubuti wa miradi mbalimbali inayotekelezwa ndani ya Halmashauri.Kamati hiyo imefanya ziara katika kata ya Arusha chini na Kahe kukagua miradi ya maendeleo yenye thamani ya zaidi ya shilingi 170,000,000 ya kitanzania.

Mradi wa shule ya sekondari Langasani ni moja kati ya miradi minne iliyotembelewa.Shule hii ni mojawapo ya shule zilizopokea fedha kutoka serikalini za EP4R (lipa kutokana na matokeo) kutokana na Halmashauri ya Wilaya ya Moshi kufanya vizuri katika matokeo ya kidato cha nne mwaka 2018.Halmashauri ya Moshi ilishika nafasi ya 13 kati ya Halmashauri 145 Tanzania zilizofanya mtihani.Shule ilipokea kiasi cha shilingi 121,600,000 kwa ajili ya ujenzi wa madarasa mawili,bweni moja na matundu sita ya vyoo.

Shule ipo kata ya Arusha chini,kijiji cha Mikocheni,ilianzishwa mwaka 1995 ambapo mpaka sasa ina jumla ya wanafunzi 826 ,wavulana 327 na wasichana 499 kati yao 137 ni wasichana wa kidato cha tano na sita.

Miradi yote ya shule hiyo iko katika hatua za umaliziaji.

Akizungumza wakati wa ziara hiyo Kaimu Mwenyekiti wa kamati fedha,uongozi na mipango Mhe.Emmanuel Mnzava amepongeza jitihada zinazofanywa na timu nzima ya watendaji wa Halmashauri kwa kufanikisha miradi hiyo kufikia hatua nzuri iliyopo sasa mbali na changamoto mbalimbali ikiwemo hali ya hewa iliyoambatana na mvua nyingi na upungufu wa fedha zilizojitokeza wakati wa utekelezaji wa majukumu yao.  

“Mradi huu tulitegemea ukamilike tarehe 30/07/2019 lakini kutokana na changamoto mbalimbali ikiwemo hali ya hewa iliyoambatana na mvua nyingi na upungufu wa fedha,mradi uko katika hatua nzuri japo bado tunahitaji nguvu za wananchi zaidi.Tunaishukuru serikiali kwa fungu lakini bado sisi wananchi wa Moshi hasahasa wa kata ya Arusha chini ambako mradi upo, tuchangie kwa hali na mali kufanikisha miradi yenye manufaa kwetu inakamilika kwa haraka.”amesema Mhe.Mnzava

Aidha kamati imetembelea eneo la mradi wa soko la Mikocheni na vyoo vya umma vilivyomo ndani ya kijiji cha Mikocheni kata ya Arusha chini.

“Nasisitiza tuongeze mawasiliano ya karibu na ushirikishwaji kwa viongozi wote kuanzia ngazi ya vitongoji ,vijiji na kata ili miradi yetu yote iweze kukamilika kwa wakati na kuleta manufaa kwa jamii yetu yenye uhitaji” amesema Diwani wa kata ya Arusha Chini Mhe. Rojas Mmari.

Kamati imepongeza timu nzima ya Halmashauri kwa kuendelea kutumia nguvu kazi za wenyeji “force account” katika miradi yote inayoendelea kutekelezwa ndani ya Halmashauri kwa lengo la kupunguza gharama zinazoweza kuepukika na kupata matokeo mazuri ambayo yatakuwa fahari ya wenyeji na taifa kwa ujumla.