Epuka maambukizi mapya ya VVU

Posted on: December 1st, 2018

Halmashauri ya Wilaya ya Moshi imeungana na taasisi zingine za serikali na zisizo za serikali katika kuazimisha siku ya UKIMWI (Upungufu wa Kinga Mwilini) duniani leo tarehe 01 Desemba 2018. Maazimisho hayo yamefanyika katika shule ya sekondari Mwika iliyopo kata ya Mwika Kaskazini , kijiji cha Maring’a ndani ya Wilaya ya Moshi.

Tukio hilo limehudhuriwa na wanafunzi wa Mwika,wataalam mbalimbali,wadau wa masuala ya kupambana na ugonjwa wa UKIMWI na mamia ya wananchi wa kata ya Mwika.Kauli mbiu ya siku hii kwa mwaka 2018 ni “Pima ,Jitambue,Ishi”. UKIMWI husababishwa na  Virusi Vya Ukimwi (VVU).

Sherehe hizo zimepambwa na shamrashamra nyingi  ikiwemo maigizo,ushairi,nyimbo na makala. Shamrashamra hizo zimesheheni elimu, jumbe nzito,makatazo na maonyo makali juu ya masuala mbalimbali yanayohusu ugonjwa hatari wa UKIMWI.

Kaimu Mkurugenzi Mtendaji ndugu Peter Malendecha ambae ndiye mgeni rasmi katika tukio hili ameitaka jamii kuhamasika katika suala la kupima na kutambua afya zao kwani ni muhimu na faida kwao kwa kuwa unapojitambua mapema inakupa fursa ya kuanza dawa mapema na kuweka mipango ya maisha yako vizuri zaidi.

Mhe. Malendecha ametoa takwimu za kitaifa zinazoonyesha kuwa ni asilimia 52.2 tu ya wananchi wenye umri  wa miaka 15 hadi 64 ndiyo wanaojua hali zao ikilinganishwa na lengo la kitaifa la asilimia 90 lililowekwa ifikapo mwaka 2020.

Sambamba na hayo Mhe.Malendecha ameiasa na kuitaka jamii ya Moshi kwa ujumla kujikinga na maambukizi mapya,kuacha kufanya ngono zembe,kwa walioathirika kuendelea kutumia dawa kwa ufasaha ili kupunguza kasi ya virusi kuzaliana mwilini pamoja na kina mama wajawazito kupima na wenza wao wakati wa kuhudhuria kliniki ya wajawazito.

Wakati wa maadhimisho hayo mada zinahusu jamii na UKIMWI ziliwasilishwa na wataalam wa Maendeleo ya jamii kutoka Halmashauri ya Wilaya ya Moshi.

Afisa maendeleo ya jamii Bi Bertha Yairo amewaasa jamii ya Moshi kwa ujumla juu ya masuala ya ukatili unaofanyika katika jamii huku wahusika na waathirika wake wakubwa wakiwa ni kina mama na watoto. Amezitaka jamii kuacha mara moja vitendo hivyo vya ukatili kwani ni kinyume cha haki za binadamu.

Bi Yairo ameongeza kuwa zipo aina nyingi za ukatili ambao huchangia katika maambukizi ya VVU kama vile ukatili wa kijinsia ,kingono,kulawitiwa na ukeketaji.Hivyo ni jukumu la jamii kutokaa kimya.”Jamii ya Moshi tupaze sauti juu ya majanga ya ukatili wa aina yoyote ,tuokoe kizazi chetu”amesema .

Bi.Yairo ameweka wazi kuwa waathirika wa ukatili wanaweza kutoa taarifa maeneo mbalimbali kama vile ngazi ya familia majumbani,ofisi ya Mtendaji wa kijiji,ofisi ya Mtendaji wa kata,Afisa Ustawi wa jamii aliyepo jirani , polisi .

Aidha Mratibu wa UKIMWI ngazi ya Wilaya Bi.Lydia Njau ameijulisha jamii uwepo wa mpango taifa wa serikali juu ya asilimia 90 tatu,ambapo 90% ya kwanza inamaanisha kufikia mwaka 2020 tunapaswa kufikia 90% ya watu kujua hali zao za maambukizi ya VVU,90% ya pili inamaanisha watakaogundulika kuwa na maambukizi ya VVU wawe kwenye dawa za kufubaza VVU na 90% ya tatu ikimaanisha wanaotumia dawa kuwa na VVU vilivyofubazwa.

Mhe.Malendecha amehitimisha kwa kutoa wito kwa wananchi wote wa Wilaya ya Moshi kupima, ’’WanaMoshi hasahasa wanaume tujitokeze kwa wingi katika vituo vyetu vya kutolea huduma za afya ,tupime kujua afya zetu,kwa wale watakaogundulika kuwa na maambukizi waanze dawa za kufubaza VVU mara moja.Tutekeleze kauli mbiu yetu ya Pima,Jitambue,Ishi”  .